ಮತ್ತೆ ಬಂದೈತೆ ಭೀಕರ ಬರಗಾಲ
ಜಗಕೆ ಬಂದೊದಗೇತೆ ಕೇಡುಗಾಲ
ಪಾತಾಳ ಮುಟ್ಟೈತೆ ಅಂತರ್ಜಲ
ಸಂಕಷ್ಟಕೆ ಸಿಕ್ಕೈತೆ ಜೀವಜಾಲ
ಮಳೆಗಾಲದಲ್ಲೇನೆ ಮಳೆ ಕಾಣಲಿಲ್ಲ
ಬಿರು ಬೇಸಿಗೆಯಲ್ಲಿ ಧಗೆ ಆರದಲ್ಲ
ಹೀಗೆ ಆದರೆ ಬದಕಿಗುಳಿಗಾಲವಿಲ್ಲ
ಮಾನವನತಿಯಾಸೆಗೆ ಫಲ ಸಿಕ್ಕಿದೆಯಲ್ಲ
ಖಗಮೃಗಗಳೆಲ್ಲ ಕಂಗಾಲಾಗಿಹವು
ಗಿಡದಲ್ಲೇ ಬಾಡಿ ಹೋಗಿವೆ ಹೂವು
ಯಾವ ಕೋಪಕೋ ಇಂತಹ ಶಾಪವು
ಕೇಳುವರಾರು ಬಿರಿದೊಡಲ ನೋವು
ಅಭಿವೃದ್ಧಿಯ ಹೆಸರಿನಲ್ಲಿ
ಹತವಾದವು ಸಹಸ್ರಾರು ವೃಕ್ಷ
ಮಾನವನ ಹದ್ದುಮೀರಿದ
ಬುದ್ಧಿಗೆ ನೀಡದಿರುವುದೆ ಪ್ರಕೃತಿ ಶಿಕ್ಷೆ
ಇನ್ನಾದರೂ ಎಚ್ಚೆತ್ತುಕೊಳ್ಳೋಣ
ವೃಕ್ಷ ಸಂಪತ್ತನ್ನು ರಕ್ಷಿಸೋಣ
ಮಳೆಗಾಗಿ ಪ್ರಾರ್ಥಿಸುವುದ ಬಿಟ್ಟು
ಕಾಡು ಬೆಳೆಸೋಣ ಗಿಡ ನೆಟ್ಟು
೧೦೪೯ಪಿಎಂ೨೯೦೨೨೦೨೪
*ಅಮು ಭಾವಜೀವಿ ಮುಸ್ಟೂರು*
*ಗಝಲ್*
ಬದುಕಿನ ಹಾದಿಯನ್ನು ಅಡ ಇಡಲಾಗಿದೆ
ಬಸಿದ ಬೆವರನ್ನು ಇಲ್ಲಿ ಅಡ ಇಡಲಾಗಿದೆ
ಬಿರು ಬೇಗೆಯಲ್ಲಿ ದಣಿವಿರದೆ ದುಡಿವ ಜೀವಗಳುಂಟು
ಬೆಳಗು ಬೈಗುವರೆಗೂ ದುಡಿದುದನೆಲ್ಲ ಶರಾಬಿಗೆ ಅಡ ಇಡಲಾಗಿದೆ
ಸತಿಸುತರೆಲ್ಲ ಹಸಿವೆಯಿಂದ ನರಳುತ್ತಿದ್ದಾರೆ
ದುಡಿದ ಬಿಡಿಗಾಸನು 'ಅವಳ' ಸೆರಗಿಗೆ ಅಡ ಇಡಲಾಗಿದೆ
ಸಾಲಗಾರನ ಮುಂದೆ ಸಂಕಟ ಹೇಳಿಕೊಂಡರೇನು ಪ್ರಯೋಜನ
ಬಡಪಾಯಿ ಬದುಕನ್ನು ಸಾಲದ ಶೂಲದ ಸಾವಿಗೆ ಅಡ ಇಡಲಾಗಿದೆ
ಎಷ್ಟೇ ಬುದ್ಧಿವಾದ ಹೇಳಿದರು ಕೆಲಸಕ್ಕೆ ಬಾರದು ಅಮು
ಕ್ಷಣದ ಆಮಿಷಗಳಿಗೆ ದುಡಿದ ಇಡೀ ಬದುಕನ್ನು ಅಡ ಇಡಲಾಗಿದೆ
4:55 ಪಿಎಂ02032024
*ಅಮು ಭಾವಜೀವಿ ಮುಸ್ಟೂರು*
ಬೇಯಬೇಕು ನೋಯಬೇಕು
ಸಾಯೋ ಮುನ್ನ ಗೇಯ ಬೇಕು ಬದುಕನು
ಸಾಲ ಪಡೆದು ಸೋಲಬೇಕು
ಸೋತಲ್ಲೇ ಗೆಲ್ಲಬೇಕು ಮೆಟ್ಟಿ ಅವಮಾನವನು
ಬಡತನವೆಂಬ ಕಠಿಣ ಪರೀಕ್ಷೆ
ಕುಸಿಗೊಳಿಸುವುದು ಎಲ್ಲ ನಿರೀಕ್ಷೆ
ತಂದದ್ದು ಏನಿಲ್ಲ ಇಲ್ಲಿ
ಬಿಟ್ಟು ಹೋಗಲೇಬೇಕು ಕೊನೆಗಲ್ಲಿ
ಹಣದ ಹಿಂದೆ ಎಲ್ಲ ಬಂಧ
ಗುಣಕ್ಕೆ ಹಾಕಿ ದಿಗ್ಬಂಧ
ಅಳೆದು ತೂಗಿ ತೊರೆದು ಹೋಗಿ
ಆಳಿಗೊಂದು ಕಲ್ಲೆಸೆವರು ಬಿದ್ದಿರಲು ಜೋಗಿ
ಬದುಕ ಕುಲುಮೆ ರಂಗಿಗೆ ಮರುಳಾಗಿ
ಬಿದ್ದು ಪತಂಗ ಹೊರಳಾಡುವಂತೆ
ದೂರ ಸರಿದವರೆಲ್ಲರ ಸಹಾಯಕ್ಕಾಗಿ
ವಿಲವಿಲ ಒದ್ದಾಡಿಸುವುದು ಬದುಕಿನ ಕಥೆ
ಬೆಂದ ಅನ್ನ ರುಚಿಸುವಂತೆ
ಬೆಂದ ಬದುಕು ಮರೆಯದಂತೆ
ಹೋರಾಟದ ಹಾದಿಯಲ್ಲಿ
ನೆಮ್ಮದಿಯಾ ಹುಡುಕುವ ಚಿಂತೆ
10:35 ಪಿಎಂ 02.03.2024
*ಅಮು ಭಾವಜೀವಿ ಮುಸ್ಟೂರು*
ಬಾಳಲು ಎಂದು ಬಂದ ನಾವು
ಮೊಗ್ಗು ಬಿರಿದು ಅರಳೋ ಹೂವು
ಕಷ್ಟದ ಮುಳ್ಳಿನ ಮೊನಚಿನ ನಡುವೆ
ಮೃದು ದಳ ಹರಿಯದಂತೆ ನಗುವ ಗೊಡವೆ
ನೋವಿನ ಉರಿ ತಾಪ ಮೇಲೆ
ಬಡತನದ ಬಿರುಗಾಳಿ ಲೀಲೆ
ಒಲವಿನ ಮಂಜಿನ ಹನಿಸ್ಪರ್ಶ
ತಂದಿತು ಬಾಳಲ್ಲಿ ಕ್ಷಣ ಹರ್ಷ
ನಾನು ಬಡವಿ ಆತ ಬಡವ
ಒಲವೇ ನಮ್ಮ ಬದುಕು
ಬೆಂದ ಬೇಂದ್ರೆ ನುಡಿದ ಮಾತು
ಬಳಸಿಕೊಳ್ಳಬೇಕು ಅದಕು ಇದಕು ಎದಕು
ಬಾಳ ಒಳ್ಳೆ ಸುಳಿಗಳು ನೂರಾರು
ಬಿಡಿಸಿಕೊಳ್ಳಲುಂಟು ತಕರಾರು
ಪ್ರೀತಿಯ ಪಯಣದಲ್ಲಿ ಹೆಣಗಾಡಿ
ದಂಪತಿ ನಾವಾಗಿ ಹೊರಡೋಣ ದಾಂಗುಡಿ
ಬಾ ಹತ್ತಿರಕ್ಕೆ ಆ ಎತ್ತರಕ್ಕೆ
ಏರಲು ಬೇಕು ದಾಂಪತ್ಯದಾಸರೇ
ಮುಪ್ಪನ್ನು ಅಪ್ಪಿ ಬಾಳ ತೆಪ್ಪದಲ್ಲಿ
ಬೀಳದಂತೆ ಒಪ್ಪದಿಂದ ಗುರಿದಡ ಸೇರೋಣ
10:46 ಪಿಎಂ 02032024
*ಅಮುಭಾವಜೀವಿ ಮುಸ್ಟೂರು*
ಬಂಧ ಬಿಗಿಯಾಗಲು ಅವಳೇ ಕಾರಣ
ಅನುಬಂಧ ಹಸನಾಗಲು ಅವಳೇ ಪ್ರೇರಣ
ಬದುಕಿನ ನೋವುಗಳಿಗೆ ಅವಳೇ ಸಾಂತ್ವಾನ
ಬರುವ ಕಷ್ಟಗಳ ಗೆಲ್ಲಲು ಅವಳೇ ಚೇತನ
ಜೀವನದ ಪರೀಕ್ಷೆಗಳಿಗೆ ಅವಳೇ ಉತ್ತರ ಪತ್ರಿಕೆ
ಸೋಲನ್ನು ಗೆಲುವಾಗಿಸುವುದೇ ಅವಳ ಒಡಂಬಡಿಕೆ
ಜಗದಿ ಪಸರಿಸಿದೆ ಅವಳ ಸ್ನೇಹ ಪರಿಮಳ
ಜಗವ ತೂಗಿದ್ದು ಅವಳೊಲವ ಜೋಗುಳ
ಮೊಳಕೆಯಿಂದ ಮರದ ನೆರಳವರೆಗೂ
ಪ್ರತಿ ಹಂತಕ್ಕೂ ಅವಳಿಂದಲೇ ಮೆರುಗು
ತುಳಿಯುವವರ ಮಧ್ಯೆ ಬೆಳೆದು
ಆಳ್ವಿಕೆ ನಡೆಸುವ ಛಲ ಅವಳದು
ಕರುಣೆಯ ಕಡಲಿಗೆ ತಾಯಿಯವಳು
ಮಮತೆಯ ಮಡಿಲಿಗೆ ಮೇರು ಅವಳು
ಸ್ನೇಹದ ಬಾಂಧವ್ಯಕ್ಕೆ ಬಂಧ ಬೆಸೆದವಳು
ಪ್ರೀತಿಯ ಅನುಬಂಧಕೆ ಸಿಂಧುವಾದವಳು
ತಾಯಿ ಸೋದರಿ ಗೆಳತಿ ಹೆಂಡತಿ ಮಗಳು
ಪ್ರತಿ ಹಂತದಲ್ಲೂ ಅವಳಿಗೆ ಸಾಟಿ ಅವಳೇ ಆಗಿಹಳು
ಪುರುಷ ಪೌರುಷಕ್ಕೆ ನಲುಗಿದರು
ಸಂಸಾರದ ಹರುಷಕ್ಕೆ ಅವಳೇ ಬೇರು
ಜಗ ಮೆಟ್ಟಿಲಾಗಿ ಏರಲಿ ಅವಳು ಶಿಖರ
ಹೃದಯ ತುಂಬಿ ಹರಸಲಿ ಮನುಜ ಸಂಸ್ಕಾರ
೦೮ಎಎಂ೦೭೦೩೨೦೨೪
ಅಮು ಭಾವಜೀವಿ ಮುಸ್ಟೂರು
ಬಿದ್ದು ಬರಲಿದೆ ಬದುಕು
ಬರಗಾಲ ತಂದಿದೆ ಬಿರುಕು
ಕಾದು ಹೆಂಚಿನಂತಹ ಒಡಲು
ಆವಿಯಾಗುತಿದೆ ಹನಿ ಇಲ್ಲಿ ಬೀಳಲು
ಮುನಿದ ಸೂರ್ಯನ ಕೆಂಗಣ್ಣು
ಬೆಂಕಿಯಾಗಿದೆ ಸುಡುವ ಮಣ್ಣು
ಹೆಜ್ಜೆ ಇಡಲು ಬೊಬ್ಬೆ ಕೀಳುತ್ತಿದೆ
ಯಾವ ಪಾಪಕೆ ಈ ಗತಿ ಬಂದಿದೆ
ಆಗೆಲ್ಲ ಎಷ್ಟೊಂದು ಚೆಂದವಿತ್ತು
ಎಲ್ಲೆಲ್ಲೂ ಹಸಿರೇ ತುಂಬಿತ್ತು
ಜೀವಜಲ ಧಾರೆಯಾಗಿ ಹರಿಯುತ್ತಿತ್ತು
ಈಗೆಲ್ಲಾ ಬರಿದಾಗಿ ಬತ್ತಿ ಸತ್ತಿತು
ಮರ ಬೆಳೆಯುವ ಜಾಗದಲ್ಲಿ ಮನೆಗಳೆದ್ದು
ಕೆರೆಕುಂಟೆಗಳೆಲ್ಲ ನಗರಗಳಾಗಿ ಬೆಳೆದು
ರಸ್ತೆಗಾಗಿ ನಿತ್ಯ ಸತ್ತ ಮರಗಳೆಷ್ಟೋ
ನೀರಿಗಾಗಿ ಕೊರೆದ ಬಾವಿಗಳು ಲೆಕ್ಕವಿಲ್ಲದಷ್ಟು
ಬಸಿಯುವವರೇ ಎಲ್ಲ
ಉಳಿಸುವವರು ಯಾರಿಲ್ಲ
ಬರಕಾಲದ ಭೀಕರತೆಗೆ ಕಾರಣ ಎಲ್ಲಾ
ಹೀಗೆ ಆದರೆ ಇನ್ನೂ ಉಳಿತಾಯವಿಲ್ಲ
ನಗರ ಕೇಂದ್ರೀತ ಬದುಕು ಬೇಡ
ಪ್ರಕೃತಿಯೊಂದಿಗೆ ಬದುಕು ಸಹಜ ನೋಡ
ಬೆವರು ಹರಿಸಿದರೆ ಉಸಿರು ಹಸನು
ರಟ್ಟೆ ದುಡಿದರೆ ಹೊಟ್ಟೆ ಬಳಲ್ಲದಿನ್ನು
ಒಡೆದ ಕಟ್ಟೆಗಳ ದುರಸ್ತಿ ಮಾಡಿ
ದುರಾಸೆ ಮನಗಳಿಗೆ ಅಣೆಕಟ್ಟು ಕಟ್ಟಿ
ಓಡುವ ನೀರನ್ನು ನಿಲ್ಲಿಸಿ ಇಂಗಿಸಿ
ಅಂತರ್ಜಲಕ್ಕೆ ಮರುಜನ್ಮ ನೀಡುವ ಬನ್ನಿ
ಮಣ್ಣಿನೊಂದಿಗೆ ಇರಲಿ ಚಿರಬಾಂಧವ್ಯ
ಮಣ್ಣ ಸೇರಿದರೆ ಬೆವರು ಬದಲಾಗುವುದು ಭವಿಷ್ಯ
ನಗರದಾಮಿಷಗಳಿಗೆ ಬಲಿಯಾಗಬೇಡಿ ಯುವಕರೆ
ಹಳ್ಳಿಯಲಿದ್ದು ಒಳ್ಳೆಯವರಾಗಿ ಬದುಕಲು ನೀಡಿ ಕರೆ
0221ಪಿಎಂ10032024
*ಅಮು ಭಾವಜೀವಿ ಮುಸ್ಟೂರು*
