ಕವನ

ಕನ್ನಡಿಗೂ ಕೂಡ ಮೋಹ

ಬಂದಂತಿದೆ ಇವಳ ಮೇಲೆ

ಏನೆಂದು ಬಣ್ಣಿಸಲಿ ಮುಗ್ಧ

 ಸ್ನಿಗ್ಧ ಚೆಲುವ ಹೆಣ್ಣಿನ ಲೀಲೆ

ಕಣ್ಣು ಕಪ್ಪಿನ ಹೊಳಪು ಕಂಡರೆ ಸಾಕು

ಮನವು ತನ್ನ ತಾ ಮರೆತು ಸೋಲುವುದು

ರೇಶಿಮೆಯ ನಯವಾದ ಮುಂಗುರುಳು ಸೋಕಲು

ಮನವು ತಂಗಾಳಿಯಲಿ ಚಿಟ್ಟೆಯಂತೆ ಹಾರುವುದು

ಕೈಯ ಬಳೆ ಸದ್ದಿಗೆ ಸೋತ ಮನವು

ಸಂತೋಷದಿ ಸಂಭ್ರಮಿಸುವುದು

ನಡೆವ ಕಾಲ್ಗೆಜ್ಜೆ ದನಿ ಇಂಪಿಗೆ

ಮನದಿ ಮಾರ್ಧನಿಸಿ ಮೋಹ ಉಕ್ಕಿಸುವುದು

ಇವಳ ನಗುವ ಹೊಳಪು

ಬೆಳದಿಂಗಳು ಚೆಲ್ಲಿದಂತೆ

ಅವಳ ಮನವಿಹುದು 

ಶುಭ್ರ ಮಲ್ಲಿಗೆಯಂತೆ

ಇವಳ ಬಯಸಲು ಇಷ್ಟು ಸಾಕಲ್ಲ

ಅವಳ ಸನಿಹ ಸಿಗಲು ಬೇರೆ ಬೇಕಿಲ್ಲ

ಪ್ರೀತಿಯ ಮಧು ಬಟ್ಟಲು ಅವಳೊಡಲು

ಜನುಮ ಸಾರ್ಥಕ ಅವಳೊಟ್ಟಿಗೆ ಬಾಳಲು

೦೨೫೧ಎಎಂ೧೫೧೧೨೦೨೨

*ಅಮುಭಾವಜೀವಿ ಮುಸ್ಟೂರು*