ಬಂದ ದಿನರಾಯ

*ಹಳೆಯ ಮೆಲುಕು*

*ಬಂದ ದಿನರಾಯ*

ಫಳ ಫಳ ಹೊಳೆಯುತ ನಭದಲಿ
ನಲಿಯುತ ಬರುತಿಹ ದಿನಕರನು
ಮರಗಿಡಗಳನು ಬಡಿದೆಬ್ಬಿಸುತ
ಗಿರಿಪರ್ವತಗಳ ತಲೆ ನೇವರಿಸುತ ಬರುತಿಹನು

ಹಕ್ಕಿಗಳಿಂಚರ ಮಂಗಳಗಾನಕೆ
ನದಿಗಳ ಜುಳುಜುಳು ಮಂತ್ರದ ಘೋಷಕೆ
ತೆರೆಗಳ ಅಬ್ಬರದ ಸ್ವಾಗತಕೆ
ಹೊನ್ನತೇರನೇರಿ ಬರುತಿಹನು

ಮಲ್ಲಿಗೆ ಸಂಪಿಗೆ ಸುಮಗಳ ಕರೆಗೆ
ತಾವರೆ ಅರಳುವ ಸುಂದರ ಸಮಯಕೆ
ಸ್ವಾಗತ ಕೋರುತಿಹ ಜಾಜಿ ಸೇವಂತಿಗೆ
ನಗುವ ಬೀರಿ ವಂದನೆ ತೋರಿ ಬರುತಿಹನು

ಕೋಗಿಲೆ ಗಾನಕೆ ಮೈಮರೆತು
ನವಿಲಿನ ನಾಟ್ಯಕೆ ಕಣ್ಮನ ಸೋತು
ಅರಗಿಣಿಯ ಮುದ್ದಿನ ಮಾತನು ಕೇಳುತ
ಬಾನವಿಸ್ತಾರದಿ ಹೊಳೆಯುತ ಬರುತಿಹನು

ಮಲಗಿದ್ದ ಭುವಿಯ ಎಬ್ಬಿಸುತ್ತ
ಹೊನ್ನ ಬೆಳಕಲಿ ಭುವಿಯ ಬೆಳಗುತ
ಕಾಯಕ ನಿಷ್ಟೆಯನು ಜಗಕೆ ತೋರುತ
ಸೇರಿಹನು ಭುವಿಯ ಒಡಲನು ನಲಿಯುತ

0650ಎಎಂ22071998

ಅಮು ಭಾವಜೀವಿ