ಒಲವ ಕವಿತೆ

ಒಲವಿನ ಪೂಜೆಗೆ ದಿನವೇಕೆ

ಕ್ಷಣ ಒಂದಾದರೂ ಸಾಕು ಪ್ರೀತಿಸೋಕೆ

ಪ್ರೀತಿಯ ಪ್ರತಿಪಾದನೆಯೇ ಬದುಕು

ಪ್ರೀತಿಸುವ ಹೃದಯದ ಇರದು ಕೆಡುಕು 

ಇಡುವ ಹೆಜ್ಜೆಯ ಅಡಿ ಮೆತ್ತೆ ಈ ಪ್ರೀತಿ

ಜಗವ ಸಲಹುವ ಸಮಭಾವ ಅದರ ನೀತಿ

ಹೆಣ್ಣು-ಗಂಡುಗಳ ಎದೆ ಭಾವದ ಕವಿತೆ

ಕತ್ತಲು ಹೊಳೆಯುವುದು ಕಣ್ಣ ಹಣತೆ

ಮೇಲು ಕೀಳುಗಳ ಛಾಯೆ ಇರದ

ಮೇರು ವ್ಯಕ್ತಿತ್ವ ಅದರದು

ಕುರೂಪವನೂ ಅಂದಗಾಣಿಸುವ

ಅಪರೂಪದ ಅನುಬಂಧ ಪ್ರೀತಿ

ಬಡತನದಲ್ಲೂ ಸಿರಿತನ ಕಾಣುವ

ಶ್ರೀಮಂತ ಭಾವಗೀತೆ ಈ ಪ್ರೀತಿ

ದೂರುವವರನ್ನು ಆರಾಧಿಸುವ

ದ್ವೇಷ ದಳ್ಳುರಿಯನ್ನು ಆರಿಸುವ

ಸೋತ ಬದುಕಿಗೆ ಸಂಜೀವಿನಿಯಾಗಿ

ಸಮೃದ್ಧಿಯ ನೆಮ್ಮದಿ ತರುವುದು ಪ್ರೀತಿ

ಪಡೆದುಕೊಳ್ಳುವುದಕ್ಕಿಂತ ಕೊಡುವ ತೃಪ್ತಿ

ನೀಡುವುದು ಈ ಒಲವಿನ ಸಂದೀಪ್ತಿ

ಕಳೆದು ಹೋಗುವುದರಲ್ಲೂ ಗೆಲುವು ತರುವ

ಅಭಿಮಾನದ ಅಶರೀರವೀ ಪ್ರೀತಿ

ಅನುಭವಿಸೋಣ ಸದಾ ಅದನ್ನು

ಅವಮಾನಿಸಿದಂತೆ ಕಾಯೋಣ ಇನ್ನು

ಬದುಕಿನ ಘನತೆಯೇ ಪ್ರೀತಿ

ಅದರ ಅಂತಃಸತ್ವವೇ ಈ ಧರಿತ್ರಿ

0659ಎಎಂ11022022

ಅಮುಭಾವಜೀವಿ ಮುಸ್ಟೂರು