ಕವಿತೆ

ಯಾರಿವಳು ಯಾರಿವಳು

ನೋಡಿದೊಡನೆ ಮೈಮರೆಸುವವಳು

ಮುಂಗಾರಿನ ಮಿಂಚಂತೆ ಅವಳು

ನಗುವಿನಲ್ಲಿ ಸುಮವಾಗಿ ಅರಳುವವಳು

ಅಂದದಲಿ ಕಾರ್ಮುಗಿಲ ಮುಂಗುರುಳವಳು

ವಯ್ಯಾರದಲಿ ಹಂಸ ನಡಿಗೆಯವಳು 

ಅವಳೊಮ್ಮೆ ಬಳಿ ಸುಳಿದುಹೋದರೆ

ಬಿರು ಬೇಸಿಗೆಯಲ್ಲಿ ಸೋನೆ ಸುರಿದಂತೆ

ಹೊಂಗೆ ನೆರಳಿನ ತಂಪು ಅವಳೊಮ್ಮೆ ಸಿಕ್ಕರೆ

ಮಾತಲ್ಲಿ ಅವಳು ಕೋಗಿಲೆಯ ದನಿಯವಳು

ಮೌನದಲ್ಲಿ ಮಿನುಗುವ ಇಬ್ಬನಿಯು ಅವಳು

ಮೈಮರೆಸುವ ಮೋಹದ ಪತಂಗದಂತವಳು

 ಸೀರೆಯನುಟ್ಟರವಳು ಪ್ರಕೃತಿಮಾತೆ

ಲಂಗದಾವಣಿಯಲವಳು ನಲಿವ ಲತೆ

ಕಲ್ಪನೆಯ ಗುಂಗಲ್ಲವಳು ಮೂಡಿದ ಕವಿತೆ

ಅವಳೊಲವು ಸಾಗರದಲೆಗಳ ರೀತಿ

ಅವಳ ಚೆಲುವು ಆಕರ್ಷಣೆಯ ಶಕ್ತಿ

ಅವಳೆಂದರದುವೇ ಭಾರತೀಯ ಸಂಸ್ಕೃತಿ

ಬೇಕಿಲ್ಲ ಈ ಚೆಲುವೆಗೊಡವೆ

ಕೋಟಿಯೊಳಗೊಬ್ಬಳಿ ಚೆಲುವೆ

ಅವಳಿಗಾಗಿಯೇ ನಾ ನಿತ್ಯ ಬರುವೆ

ನಾಳೆಗಳಿರುವವು ಅವಳಿರುವ ತನಕ

ಬಾಳಿಗವಳೆ ಹೆಮ್ಮೆಯ ಪ್ರತೀಕ

ಅವಳು ಮತ್ತೆ ಮತ್ತೆ ಸೆಳೆವ ಚುಂಬಕ

0653ಪಿಎಂ19052022

*ಅಮುಭಾವಜೀವಿ ಮುಸ್ಟೂರು*