ಬವಣೆಗಳನ್ನು ಬಯಸದೆ ಅನುಭವಿಸಿದೆ
ಬಯಸಿದುದನು ಬಳಿ ಬಾರದಂತೆ ತಡೆದೆ
ಎದೆಗುಂದದೆ ಬದುಕುವ ನನ್ನ ಹಂಬಲಕ್ಕೆ
ಮತ್ತೆ ನಿರಾಸೆಯ ಕಾರ್ಮೋಡ ಕವಿದಿದೆ

ಎದೆಯ ನೋವುಗಳಿಗೆಲ್ಲಾ
ಸಾಂತ್ವನದ ಒಂದು ಮಾತಿಲ್ಲ
ಇಂಗದ ಬದುಕುವ ದಾಹಕ್ಕೆ
ಯಾವುದೇ ಬೆಂಬಲ ಸಿಗಲಿಲ್ಲ

ಅವಮಾನದ ಮೊನಚು ಚುಚ್ಚಿ ಎದೆಗೆ
ಅವಸಾನದ ಭಯ ತಂತು ಕೊನೆಗೆ
ಸೋಲಬಾರದೆಂದು ಮುನ್ನಡೆಯುವಾಗ
ಸಹಿಸದ ಕೈಯನ್ನು ತಳ್ಳಿತ್ತು ಬಾವಿಯೊಳಗೆ

ಬೇಸರಿಸುವ ಬದಲು ಆಸರೆ ಹುಡುಕುತಿರುವೆ
ಕೆಸರಿನೊಳಗೆ ನಾ ಅರಳುವ ಕಮಲವಾಗುವೆ
ಬೆನ್ನು ತಟ್ಟುವವರು ಇಲ್ಲದಿದ್ದರೂ  ಪರವಾಗಿಲ್ಲ
ಬೆಂದು ಬೆಳಕಾಗಿ ನಿತ್ಯ ಕತ್ತಲನು ನಾ  ನೀಗುವೆ

ಎಷ್ಟೇ ಕಷ್ಟ ಎದುರಾಗಲಿ
ಯಾವ ನಿಷ್ಟುರವೆ ದಹಿಸಲಿ
ಕಷ್ಟಪಟ್ಟು ಮೇಲೆ ಇರುವೆ
ಆಗಲಾದರೂ ಸುಖ ಸಿಗಲಿ

೦೫೩೩ಎಎಂ೦೯೦೯೨೦೨೧
ಅಪ್ಪಾಜಿ ಎ ಮುಸ್ಟೂರು ಸುಧಾ


ಹೀಗೆ ನಿನ್ನ ಮಡಿಲಲ್ಲಿ ಮಲಗಿ
ಹಾಗೆ ಸತ್ತು ಹೋಗುವ ಬಯಕೆ
ಹೀಗೆ ನಿನ್ನ ನಗುವ ನೋಡುತ್ತಾ
ಹಾಗೆ ನನ್ನೆಲ್ಲಾ ನೋವು ಮರೆಯೋ ಬಯಕೆ
ಒಡಲ ಒಡನಾಡಿ ನೀನು
ಬಾಳಪಯಣದ ಸಾರಥಿಯಿನ್ನೂ
ಜೀವ ಜೀವನಗಳೆರಡೂ
ನಮ್ಮಿಬ್ಬರಂತೆ ಅನ್ಯೋನ್ಯವಾಗಿರಲಿ

೦೬೨೨ಎಎಂ೦೯೦೯೨೨೧
*ಅಪ್ಪಾಜಿ ಎ ಮುಸ್ಟೂರು ಸುಧಾ*