ನನ್ನ ನಾ ಮರೆಯುವ ಮುನ್ನ
ಕ್ಷಮಿಸಿರುವೆ ನಿನ್ನ ತಪ್ಪನ್ನು

ಪ್ರೀತಿಸು ಎಂದು ಅಂಗಲಾಚಿ
ಮೋಹವ ನೀನಲ್ಲಿ ಮರೆಮಾಚಿ
ಕಾಡಿದೆ ಬೇಡಿದೆ ಕನಿಕರಿಸಿ
ಒಪ್ಪಿದ್ದಕ್ಕೆ ನನಗೆ ಈಗ ಇಂತಹ ಶಿಕ್ಷೆ

ನಿನ್ನ ವಶವಾಗಿಸಿ ಕೊಂಡು
ನನ್ನ ಕೃಶವಾಗಿ ಕೊಂದು
ಬದುಕುವ ಭರವಸೆಯನ್ನೇ
ಕಿತ್ತೊಗೆದು ನನ್ನೊಳು ಇಂದು

ನಿನ್ನ ನಗುವೇ ಪ್ರೀತಿ ಎಂದು ನಂಬಿ ಮನಸ್ಸು ಕೊಟ್ಟು  ಕಂಗಾಲಾದೆ
ಮೈಮರೆಸಿ ನನ್ನ ಸೇವಿಸಿ
ಜೀರ್ಣವಾಗದೆ ಬಾಳ ಅಜೀರ್ಣ ಮಾಡಿದೆ

ನಿನ್ನ ಕಪಟಕ್ಕೆ ನನ್ನ ಚಡಪಡಿಕೆ
ಹೊರೆ ಹೊತ್ತು ನೆರವು ಬೇಡಿದೆ
ಎಲ್ಲಿ ಮರೆತಿರುವೆ ನೀನಾರು
ಎನ್ನಲು ಕುಸಿದೆ ಇಲ್ಲದೆ ಒಂದು ಸೂರು

ನಾನಂತೂ ತಬ್ಬಲಿ
ನಿನಗೆ ಬಾಳು ಆಗದಿರಲಿ ಬಲಿ
ನಾ ಮರೆಯುವ ಮುನ್ನ
ಬಂದು ಸೇರುವೆಯ ನನ್ನ

ಅಮುಭಾವಜೀವಿ